பிரித்தானியாவில் விமானப் போக்குவரத்தைக் கையாளும் NATS அமைப்பில் தொழில்நுட்பக் கோளாறு ஏற்பட்டதால் நூற்றுக்கணக்கான விமானங்கள் ரத்து செய்யப்பட்டுள்ளன. FlightRadar24 தகவலின்படி சுமார் 1,000 விமானங்கள் வரை பாதிக்கப்பட்டிருக்கலாம். பல்லாயிரக்கணக்கான பயணிகள் சிக்கியுள்ளனர்.
NATS தலைமை அதிகாரி மார்ட்டின் ரோல்ப் மன்னிப்புக் கோரி, முழு விசாரணை நடைபெறும் எனத் தெரிவித்துள்ளார். போக்குவரத்துச் செயலர் ஹெய்டி அலெக்சாண்டர் அவரைச் சந்தித்து விளக்கம் கேட்கவுள்ளார். இக்கோளாறு சைபர் தாக்குதல் அல்ல என அரசு உறுதியாகக் கூறியுள்ளது.
ஈஸிஜெட் சுமார் 200 விமானங்களையும், பிரிட்டிஷ் ஏர்வேஸ் 100க்கும் மேற்பட்ட விமானங்களையும் ரத்து செய்துள்ளன. ஹீத்ரோ, காட்விக், மான்செஸ்டர், பர்மிங்காம் உள்ளிட்ட விமான நிலையங்கள் அதிகம் பாதிக்கப்பட்டுள்ளன. ஸ்காட்லாந்து மற்றும் அயர்லாந்திலும் தாமதங்கள் பதிவாகியுள்ளன.
விமானங்கள் புறப்பட முடியாததால் தரையில் இடநெருக்கடி ஏற்பட்டு, வெளிநாட்டு விமான நிலையங்களிலிருந்து புறப்பட வேண்டிய சில விமானங்களும் நிறுத்தப்பட்டன. ஹீத்ரோவை நோக்கி வந்த 13 விமானங்கள் வேறு இடங்களுக்குத் திருப்பி விடப்பட்டன.
தொழில்நுட்பப் பிரச்சினை சரி செய்யப்பட்டாலும், குவிந்துள்ள பின்னடைவைச் சரி செய்ய நேரம் எடுக்கும். பயணிகள் விமான நிலையத்துக்குச் செல்வதற்கு முன், தமது விமான நிலையை விமான நிறுவனத்திடம் உறுதிப்படுத்திக் கொள்ளுமாறு அறிவுறுத்தப்பட்டுள்ளனர்.