வார இறுதியில் பிரான்சின் பல நகரங்களில் வன்முறை மற்றும் குழப்பமான காட்சிகள் அரங்கேறியதைத் தொடர்ந்து, பொதுமக்களின் பாதுகாப்பு மற்றும் வணிக நிறுவனங்களின் சொத்துக்களைப் பாதுகாக்கும் நோக்கில், திங்கட்கிழமை மாலை முதல் பல பகுதிகளில் “பகுதி அளவிலான” மற்றும் “உள்ளூர் அளவிலான” ஊரடங்குகளை அமல்படுத்துமாறு மாவட்ட ஆட்சியர்களைக் கேட்டுக்கொண்டுள்ளதாகப் பிரதமர் Sébastien Lecornu அறிவித்துள்ளார்.
சம்பந்தப்பட்ட மேயர்களுடன் கலந்தாலோசித்த பிறகு, ஊரடங்கு அமல்படுத்தப்படும் பகுதிகள் குறித்த விவரங்கள் பிற்பகலில் வெளியிடப்படும் என்று அமைச்சகங்களுக்கு இடையிலான நெருக்கடிப் பிரிவு கூட்டத்திற்குப் பிறகு அவர் தெரிவித்தார்.
“நாட்டின் அனைத்துப் பகுதிகளிலும் குழப்பம் நிலவுவதாகத் தொலைக்காட்சிகளில் பரப்பப்படுவதில் உண்மையில்லை. நகர்ப்புறங்களின் மிகக் குறிப்பிட்ட சில பகுதிகளில் மட்டுமே குழப்ப நிலை காணப்படுகிறது. எனவே, அந்த குறிப்பிட்ட பகுதிகளில் மட்டும் ஊரடங்கை அமல்படுத்துமாறு மாவட்ட ஆட்சியர்களைக் கேட்டுக் கொண்டுள்ளேன்” என்று Sébastien Lecornu குறிப்பிட்டார்.
வியாபாரிகள் மற்றும் வர்த்தக சபைகளுடனும் மாவட்ட ஆட்சியர்கள் இதுகுறித்து ஆலோசித்து வருе வணிக நிறுவனங்களின் பாதுகாப்பிற்கு முக்கியத்துவம் அளித்து வருகின்றனர். நிலைமையைக் கட்டுப்படுத்தக் களத்தில் காவல்துறையினர் மற்றும் ஜெண்டர்மெரி படைகளின் எண்ணிக்கை மேலும் அதிகரிக்கப்பட்டுள்ளது.
தேவைப்பட்டால் அவசரநிலை பிரகடனப்படுத்தப்படும் என்றாலும், தற்போதைய சூழலுக்கு ஊரடங்கு உத்தரவுகளே மிகவும் பொருத்தமானதாகத் தெரிகிறது என்று தெரிவித்த பிரதமர், சட்டம்-ஒழுங்கை மீட்டெடுப்பதில் தனது அரசாங்கம் முழு உறுதியுடன் செயல்படும் என்றார்.
உள்துறை அமைச்சர் Laurent Nunez, கொள்ளையர்களின் நடவடிக்கைகளைக் கட்டுப்படுத்தவும் தடுக்கவும் திங்கட்கிழமை மாலையிலேயே கடுமையான நடவடிக்கைகள் செயல்படுத்தப்படும் என உறுதி அளித்தார். மேலும், செவ்வாயன்று நடைபெறவுள்ள PSG மற்றும் பார்சிலோனா அணிகளுக்கு இடையேயான கால்பந்து போட்டி திட்டமிட்டபடி எந்தவிதத் தடையுமின்றி நடக்கும் என்றும் அவர் தெரிவித்தார்.
இதனிடையே, ஜனாதிபதித் தேர்தலை இலக்கு வைத்து நாட்டில் குழப்பத்தை ஏற்படுத்தச் சில தீவிர இடதுசாரி இயக்கங்கள் முயல்வதாகப் பிரதமர் Sébastien Lecornu குற்றம் சாட்டியுள்ளார்.இந்த விவகாரம் தொடர்பாக உளவுத்துறை அதிகாரிகளுடன் அவர் அவசர ஆலோசனையிலும் ஈடுபடவுள்ளார்.