பிரான்ஸ் நாட்டின் பிரதேசமாகவும், இந்தியப் பெருங்கடலில் அமைந்துள்ள ரீயூனியன் (Réunion) தீவில், சிக்கன்குன்யா வைரஸ் காரணமாக ஒரு பெரும் சுகாதார அவசர நிலை உருவாகியுள்ளது. 2025 ஆம் ஆண்டின் ஆரம்பத்திலிருந்து இன்றுவரை 33,000 பேருக்கு சிக்கன்குன்யா காய்ச்சல் ஏற்பட்டுள்ளதாக அதிகாரப்பூர்வ தரவுகள் தெரிவித்துள்ளன.

மரண எண்ணிக்கை:
தீவின் சுகாதார அதிகாரிகள் வெளியிட்ட அறிக்கையின் படி, சிக்கன்குன்யா தாக்குதலால் இந்த ஆண்டு ஜனவரி 1 முதல் மார்ச் 30 வரை 6 பேர் உயிரிழந்துள்ளனர். குறிப்பாக, இந்த மரணங்கள் அனைத்தும் மார்ச் 6 முதல் 30 ஆம் திகதி வரையிலான குறுகிய காலப்பகுதியில் நிகழ்ந்துள்ளன என்பது வேதனைக்குரிய தகவலாகும். இது, நோய் வேகமாக பரவி உயிருக்கு ஆபத்தான கட்டத்துக்குச் சென்றுவிட்டது என்பதை எடுத்துக்காட்டுகிறது.

பரிசோதனைகள் மற்றும் பரவல் அளவு:
சிக்கன்குன்யா அறிகுறிகளுடன் மருத்துவமனைக்குச் சென்றவர்களில் 91,500 பேருக்கு பரிசோதனைகள் மேற்கொள்ளப்பட்டுள்ளன. இதில் 33,000 பேருக்கு சிக்கன்குன்யா உறுதியாகக் கண்டறியப்பட்டுள்ளது. இது, தீவின் மக்கள்தொகையில் ஒரு கணிசமான பகுதியை பாதித்துவிட்டது என்பதைக் குறிக்கிறது.

சிக்கன்குன்யா என்பது எளிதில் பரவும் வைரஸ் நோயாகும். இது பொதுவாக (அதிகமாக Aedes aegypti மற்றும் Aedes albopictus) மூலம் பரவுகிறது. இந்த நோயின் அறிகுறிகளில் திடீரென உண்டாகும் உயர் ஜுரம், கடுமையான மூட்டு வலிகள், தசைநரம்பு வலி, தலைவலி, மற்றும் தோல் பொலிவுகள் அடங்கும். சிலருக்கு நீண்டகால மூட்டு வலியாகவும் இது மாற்றம் பெறக்கூடும்.

தீவின் தற்போதைய சூழ்நிலை:
சிக்கன்குன்யா பரவலுக்கான சூழ்நிலை தற்போது ரீயூனியன் தீவில் மிக உகந்ததாக காணப்படுகிறது. அடிக்கடி பெய்யும் மழைகள் மற்றும் வெப்பத்துடன் கூடிய காலநிலை, கொசுக்கள் இனப்பெருக்கத்திற்கு சாதகமான சூழலை உருவாக்கியுள்ளது. இதன் காரணமாக, வைரஸ் பரவல் மிக வேகமாக நடைபெற்று வருகிறது.

அரசு நடவடிக்கைகள்:
தீவின் சுகாதார அதிகாரிகள், பொதுமக்களுக்கு விழிப்புணர்வை ஏற்படுத்தும் பணிகளை தீவிரப்படுத்தியுள்ளனர். கொசுக்களை கட்டுப்படுத்தும் வேலைகள், தொற்றுநோய் தடுப்பு ஸ்ப்ரேவுகள், வீடுகளில் நீர் சேமிப்பு மடைகளின் தூய்மை ஆகியவற்றில் கவனம் செலுத்துமாறு பொதுமக்களுக்கு அறிவுறுத்தப்பட்டுள்ளது.

மேலும், பயணிகள் மற்றும் சுற்றுலா பயணிகளுக்கும் முன்னெச்சரிக்கை அறிவுறுத்தல்கள் வழங்கப்பட்டுள்ளன. ஜுரம், மூட்டு வலி போன்ற அறிகுறிகள் ஏற்பட்டால் உடனடியாக மருத்துவமனை சென்று பரிசோதனை செய்யுமாறு வலியுறுத்தப்படுகிறது.

ரீயூனியன் தீவின் தற்போதைய சிக்கன்குன்யா நிலை பொதுமக்கள் மற்றும் சர்வதேச சமூகத்திற்கும் கவலையளிக்கும் ஒரு பரிமாணமாக மாறியுள்ளது. தொடர்ந்து உயரும் பாதிப்பு எண்ணிக்கையும், பலியானோர் எண்ணிக்கையும், தீவின் சுகாதார அமைப்பை சவாலுக்குள்ளாக்கி வருகின்றன. இந்த பரவலை கட்டுப்படுத்த பொதுமக்கள் ஒத்துழைப்பு மற்றும் அரசு எடுத்துக்கொள்ளும் விரைவான நடவடிக்கைகள் மிகவும் அவசியமாகின்றன.

பிரான்ஸின் Champigny-sur-Marne பகுதியில் மிகக் கொடூரமான கொலைச்சம்பவம் ஒன்று கடந்த ஞாயிற்றுக்கிழமை அன்று இடம்பெற்றுள்ளது. இதில், 42 வயதான பெண் பெரின் (Perrine) தனது வீட்டில், அவர் தினமும் உறங்கும் படுக்கையிலேயே சடலமாகக் கண்டெடுக்கப்பட்டார். இச்சம்பவம், அந்த பகுதியில் பெரும் பரபரப்பை ஏற்படுத்தியுள்ளது.

கொலையுடன் தொடர்புடையதாக குற்றம்சாட்டப்பட்டுள்ள பெரினின் கணவராகக் கூறப்படும் ஜிம்மி (Jimmy), வயது 38. சந்தேகத்தின் அடிப்படையில் கைது செய்யப்பட்டு தற்போது காவலில் வைக்கப்பட்டுள்ளார்.

கடந்த ஞாயிற்றுக்கிழமை மதியம் 2 மணியளவில், ஜிம்மியின் தந்தை, பெரினை எழுப்புவதற்காக வீட்டிற்குள் சென்றுள்ளார். ஆனால், பெரின் படுக்கையில் சுயநினைவின்றி தூங்குகிறார் என நினைத்த அவர், நெருங்கிச் சென்ற போது பெரின் அசைவின்றி கிடப்பதை பார்த்து கடும் அதிர்ச்சியடைந்தார். உடனே, அவர் மருத்துவ உதவியை நாடி அவசர மருத்துவ குழுவினரை அழைத்துள்ளார். மருத்துவக் குழுவினர் வந்து பரிசோதனை செய்த போது, பெரின் ஏற்கனவே உயிரிழந்துவிட்டார் என்பதைக் கண்டறிந்தனர்.

பின்னர், பரிசோதனைக்காக பெரினின் உடல் மருத்துவ நிபுணர்களிடம் ஒப்படைக்கப்பட்டது. பிரேதப் பரிசோதனையில் பெரினின் தலையில் ஏற்பட்டுள்ள கடுமையான காயமே அவரது மரணத்துக்குக் காரணம் என்று தெரியவந்தது. மேலும், முகப்பகுதியில் பலத்த அடிகளும் இருப்பதை மருத்துவர்கள் உறுதிப்படுத்தியுள்ளனர்.

ஜிம்மி, பெரினின் மரணத்திற்கு பிறகு தப்பிச் செல்ல முயற்சி செய்ததாகத் தகவல் கிடைத்துள்ளது. ஆனால், Champigny-sur-Marne காவல் துறையினர் அதே தின இரவில், மதுபோதையில் இருந்த ஜிம்மியை கைது செய்தனர். அதன் பின், அவரை குற்றப்புலனாய்வு பிரிவிற்கு ஒப்படைத்து விசாரணை மேற்கொள்ளப்பட்டது.

விசாரணையின் போது, பெரினின் முகத்தில் காலால் அடித்ததாக ஜிம்மி ஒப்புக்கொண்டுள்ளார். இது, அவரது செயலில் இருந்து கொலையை உறுதி செய்யும் முக்கிய ஆதாரமாக அமைந்துள்ளது.

இந்தச் சம்பவம் தற்காலிக கோபத்தினாலா அல்லது குடும்பத் தகராறினாலா ஏற்பட்டது என்பதைப் பற்றி தற்போது போலீஸார் தீவிர விசாரணை நடத்தி வருகின்றனர். இதற்கு முன்னர் ஜிம்மிக்கும் பெரினுக்கும் இடையில் ஏற்பட்ட பிணக்குகள், வன்முறை சம்பவங்கள் குறித்து அருகிலுள்ள உறவினர்களிடமும் நண்பர்களிடமும் விசாரிக்கப்படுகின்றது.

இந்த கொடூரமான கொலை சம்பவம் பிரான்ஸ் மக்களிடையே பெரும் கலக்கம் மற்றும் கவலையை ஏற்படுத்தியுள்ளது. காதல் என்பது நம்பிக்கையும் பரஸ்பர புரிந்துணர்வையும் அடிப்படையாகக் கொண்ட பந்தமாக இருக்கவேண்டும் என்பதையே மீண்டும் நினைவூட்டும் வகையிலும், பெண் பாதுகாப்பின் மீதான அவசியத்தையும் வலியுறுத்தும் சம்பவமாகவும் இது பார்க்கப்படுகின்றது.

மே 1-ஆம் தேதி தொழிலாளர் தினமாக இருந்தாலும், வணிகத் துறையில் காணப்படும் ஒரு முக்கியமான முரண்பாடு தற்போது பெரும் விவாதத்திற்கு வழிவகுத்துள்ளது. குறிப்பாக, பேக்கரிகள் போன்ற வெதுப்பகங்கள் இந்த நாளில் திறக்க அனுமதிக்கப்படுகின்றன. ஆனால் அந்தக் கடைகளை நடத்தும் முதலாளிகள் மட்டும் வேலை செய்யும் சுதந்திரம் பெற்றுள்ளனர்; அவர்களது ஊழியர்களுக்கு இந்நாள் வேலைக்கான சட்ட அனுமதி இல்லை என்பதே பெரும் சிக்கலாக இருக்கிறது.

2024 ஆம் ஆண்டு வாண்டே (Vendée) பகுதியில், ஐந்து பேக்கரிகள் தங்கள் ஊழியர்களை மே 1-ஆம் தேதி வேலைக்கு அழைத்ததற்காக அபராதம் செலுத்த வேண்டிய சூழ்நிலையில் சிக்கின. இது பேக்கரி துறையின் முழுவதும் குழப்பத்தை ஏற்படுத்தியுள்ளது.

தேசிய பேக்கரி கூட்டமைப்புத் தலைவர் டொமினிக் அன்ராக்ட் (Dominique Anract) இந்த விவகாரத்தில் கருத்து தெரிவித்து, “பேக்கரிகள் 100 ஆண்டுகளுக்கும் மேலாக மே 1-ஆம் தேதி திறந்திருப்பது வழக்கம். இது நமது கூட்டு ஒப்பந்தங்களில் கூட உள்ளடக்கப்பட்டுள்ளது. ஆனால் தற்போதைய சட்டம் தெளிவில்லாமல் இருப்பதால், தொழிலாளிகளும், முதலாளிகளும் குழப்பத்திற்கு உள்ளாகிறார்கள்,” என தெரிவித்தார்.

இந்த சூழ்நிலையை சரிசெய்யும் முயற்சியாக, தொழிலாளர் விவகார அமைச்சராகிய கத்தரின் வோத்ரின் (Catherine Vautrin) மற்றும் வேலைவாய்ப்பு அமைச்சராகிய ஆஸ்ட்ரிட் பானோசியான்-பூவே (Astrid Panosyan-Bouvet) ஆகியோர் சட்டத்தில் திருத்தங்களை கொண்டு வர தயாராக உள்ளனர். இவர்களின் நோக்கம் – ஊழியர்கள் தங்களது விருப்பப்படி மே 1-ஆம் தேதி வேலை செய்ய அனுமதி பெறும் உரிமையை சட்ட ரீதியாக உறுதி செய்வது.

இந்த நடவடிக்கை, பாரம்பரியதையும் தொழிலாளர் உரிமையையும் சமநிலைப்படுத்தும் ஒரு முயற்சி எனக் கருதப்படுகிறது.

ஈஸ்டர் வார இறுதி நாட்களில், பிரான்ஸ் முழுவதும் முக்கியமான நெடுஞ்சாலைகளில் கடுமையான போக்குவரத்து நெரிசல் ஏற்படக்கூடும் என Bison Futé எச்சரிக்கிறது. இந்த நெரிசலுக்கு முக்கியக் காரணம் – Zone A பகுதிகளில் (உதாரணமாக: போர்டோ, லியோன், கிளெர்மொங்-ஃபெர்ரான்) விடுமுறைகள் துவங்குகின்றன, மற்றும் Zone B (உதாரணமாக: மார்செய், ரென்ஸ், ஸ்ட்ராஸ்பூர்க்) பகுதிகளில் விடுமுறை முடிவடைகின்றது. இதனால் மக்கள் பலரும் ஒரே நேரத்தில் பயணம் செய்ய திட்டமிட்டுள்ளனர்.

முக்கிய நெரிசல் நாட்கள்:
வெள்ளிக்கிழமை (ஏப்ரல் 18)
காலை முதல் மாலை வரை அதிகமான நெரிசல் எதிர்பார்க்கப்படுகிறது.
A1, A25, A13, A11, A63, A7 உள்ளிட்ட முக்கிய நெடுஞ்சாலைகளில் கூடுதல் நெரிசல், குறிப்பாக இத்தாலி எல்லை வழியாகவும் பேருந்துகள் மற்றும் சுற்றுலா வாகனங்கள் கூடுதலாக இருக்கலாம்.

சனிக்கிழமை (அப்ரல் 19):
மக்கள் விடுமுறைக்கு புறப்படும் நாளாக இருப்பதால், காலை நேரம் முதல் மதியம் வரை பயணங்கள் மிகவும் மந்தமாக இருக்கும்.
திங்கட்கிழமை (அப்ரல் 21):
விடுமுறை முடிந்து மக்கள் திரும்பும் நேரம் என்பதால், மாலையில் குறிப்பாக தெற்கு-வடக்கு திசைகளில் (South to North) போக்குவரத்து சுமையாக இருக்கும்.

பயணம் நேரங்கள்:
ஞாயிற்றுக்கிழமை (அப்ரல் 20):
போக்குவரத்து மிக மிதமாக இருக்கும் அதாவது நெரிசல் சமாளிக்க கூடிய அளவில் இருக்கும் என எதிர்பார்க்கப்படுகிறது. சுமூகமான பயணத்தை விரும்புவோருக்கு இது சிறந்த நாளாகும்.

பொதுப் போக்குவரத்து:
ரயில், மெட்ரோ மற்றும் பஸ் சேவைகள் சரிவர இயங்கும் என SNCF தெரிவித்துள்ளது. நெரிசலைத் தவிர்க்க இது ஒரு சிறந்த மாற்று வழியாகும்.

பாதுகாப்பு ஆலோசனைகள்:
👉உங்கள் பயணத்தை முன்பே திட்டமிடுங்கள் (நேரம் மற்றும் ;பயணிப்பதற்கான வழிமுறைகள்).
👉Bison Futé, Google Maps, Waze போன்ற செயலிகளை பயன்படுத்தி நேரடி போக்குவரத்து நிலவரத்தை சரிபார்க்கவும்.
👉நீண்ட பயணங்களுக்கு முன் உங்கள் வாகனத்தை சரிபார்க்கவும் – டயர் அழுத்தம், எரிபொருள் நிலை, பிரேக் நிலை போன்றவை.
👉குழந்தைகள் மற்றும் முதியவர்கள் பயணிக்கும்போது போதிய இடைவேளைகளை எடுத்துக் கொள்ளவும்.

ஈஸ்டர் விடுமுறையை கொண்டாடும் மக்கள் பெரிதளவில் சாலை பயணங்களைத் திட்டமிட்டு உள்ளதால், நெரிசல் தவிர்க்கப்பட முடியாது. ஆனால் சீராக திட்டமிடப்பட்ட பயணம், சரியான நாளைத் தேர்ந்தெடுக்கும் விவேகம், மற்றும் பொது போக்குவரத்து போன்ற மாற்று வழிகளால் நீங்கள் உங்கள் பயணத்தை சௌகரியமாக்கலாம்.

அமெரிக்கா முழுவதும் உள்ள மாணவர்கள், இப்போது அதிக அளவில் தமது மேற்படிப்புக்காக கனடாவின் பல்கலைக்கழகங்களை நாடுகின்றார்கள் என புதிய தகவல்கள் தெரிவிக்கின்றன.

விண்ணப்பங்களில் 27% உயர்வு
அமெரிக்க ஜனாதிபதி டொனால்ட் ட்ரம்பின் கல்விக் கொள்கைகள் குறிப்பாக பல்கலைக்கழகங்களுக்கு வழங்கப்படும் பெடரல் நிதி குறைப்பும், வெளிநாட்டு மாணவர்களின் விசா அனுமதிகளில் கடுமை ஏற்படுத்தியதுமே – இந்த மாற்றத்திற்கு காரணமாக கருதப்படுகிறது.

வான்கூவரில் உள்ள பிரிட்டிஷ் கொலம்பியா பல்கலைக்கழகம் (UBC) தெரிவித்ததின்படி, 2025 கல்வியாண்டுக்கான பட்டதாரி படிப்புகளுக்கான அமெரிக்க விண்ணப்பங்கள், 2024-இல் இருந்ததைவிட 27 சதவிகிதம் அதிகமாக உள்ளன.

அமெரிக்க மாணவர்களை தக்க வைக்கும் முயற்சிகள்
செப்டம்பர் மாதம் தொடங்கும் படிப்புகளுக்காக, அமெரிக்க மாணவர்களிடம் இருந்து பெறப்படும் விண்ணப்பங்களை விரைவில் செயலாக்கும் திட்டத்துடன், வான்கூவர் வளாகம் மீண்டும் பட்டதாரி சேர்க்கைகளைத் துவங்கியுள்ளது.

அதிகமான விண்ணப்பங்கள் பெற்ற பல்கலைக்கழகங்கள்
ரொறன்ரோ பல்கலைக்கழகம், மாணவர் எண்ணிக்கையின் அடிப்படையில் கனடாவின் மிகப்பெரிய பல்கலைக்கழகமாக இருக்கின்றது. 2025 கல்வியாண்டிற்கான ஜனவரி காலக்கெடுவுக்குள், இது அமெரிக்க விண்ணப்பங்களை அதிகமாகப் பெற்றுள்ளது. அதேபோல், வாட்டர்லூ பல்கலைக்கழகமும் அமெரிக்க மாணவர்களின் எண்ணிக்கையில் முன்னிலையில் உள்ளது.

இவ்வாறு மாணவர்களை எண்ணிக்கை அதிகரிப்பதற்கு என்ன காரணமென ரொறன்ரோ மற்றும் வாட்டர்லூ பல்கலைக்கழகங்கள் பகிரங்கமாக வெளிப்படுத்தாத நிலையில், வான்கூவர் வளாகம் மட்டும் ட்ரம்பின் கல்விக் கொள்கைகளே முக்கிய காரணம் என தெளிவாக கூறியுள்ளது.

நாடுகடத்தல் மற்றும் விசா ரத்து நடவடிக்கைகள்
ட்ரம்ப் நிர்வாகம் பல்கலைக்கழகங்களுக்கு வழங்கப்படும் நூற்றுக்கணக்கான மில்லியன் டொலரைக் குறைத்து, யூத எதிர்ப்புக்கு எதிரான போராட்டங்கள் ஒழுங்குபடுத்தப்படவில்லை என சுட்டிக்காட்டி, பல்கலைக்கழகங்களை கொள்கை மாற்றத்துக்குத் ஆளாகியுள்ளது.

மேலும், பாலஸ்தீன ஆதரவு ஆர்ப்பாட்டங்களில் பங்கேற்ற சில வெளிநாட்டு மாணவர்கள் தடுப்பு காவலில் வைக்கப்பட்டதுடன், அவர்களுக்கான நாடுகடத்தல் நடவடிக்கையும்
முன்னெடுக்கப்பட்டுள்ளது. இத்துடன், நூற்றுக்கணக்கான மாணவர்கள் விசா ரத்தாகி அமெரிக்காவில் செய்வதறியாது தவிக்கும் சூழ்நிலை ஏற்பட்டுள்ளது.

கனடாவின் புதிய வரம்புகள்
ஒரு புறம் அமெரிக்காவில் நிலவும் ஒடுக்குமுறைகள் காரணமாக மாணவர்கள் கனடாவை நாடி வருகிறார்கள் என்றாலும், கனடா தனது சர்வதேச மாணவர் எண்ணிக்கையை தொடர்ந்து இரண்டாவது ஆண்டாக கட்டுப்படுத்தி வருகிறது.
இதன் விளைவாக, அமெரிக்கா உள்ளிட்ட பிற நாடுகளின் மாணவர்களுக்கு உள்ள இடங்கள் குறைந்துவிட்டது. எதிர்காலத்தில் சர்வதேச மாணவர்களுக்கு நுழைவுத் தடை அல்லது இட வசதியில் சிக்கல் ஏற்பட வாய்ப்பிருக்கிறது.